Archive for the entrevistas Category

COMUNICADO DE REFORMULACIÓN DE ABORDAXE!

Posted in anarquismo, audiovisual, convocatorias, entrevistas, galiza, historia, internacional, noticias, opinión, península, publicacións, Uncategorized on Setembro 26, 2017 by abordaxe

img130

“(…) Que é unha opinión? É unha idea alisada, unha idea que foi uniformizada de modo a tornarse aceptable para o maior número de persoas. As opinións son ideas masificadas. É importante para o Poder que estas opinións se manteñan, pois é a través da opinión e do seu control como consegue determinados resultados (…) Que significa entón opoñerse á fabricación de opinións? Significa adquirir máis información? Opoñer contra-información a información? Non, iso non é posible, pois non interesa como ollamos para ela. Non é posible opoñerte á enorme cantidade de información coa cal somos bombardeadas diariamente con contra-información capaz de desmascarar, a través dun proceso de investigación de causas escondidas, a realidade que foi coberta por todo aquel palabreado informativo. Non, nós non podemos operar nesa dirección. Cando tentamos facelo, decatámonos de que iso non ten sentido, de que nós non queremos nin somos capazes de convencer ás persoas. (…) Ese non é o tipo de traballo que precisamos facer, e en calquera caso non contén elementos de contra-información, ou se os contén é puramente accidental. Este traballo ten esencialmente o obxectivo, ou deberia ter, de construír unha idea ou un certo número de ideas-chave, un certo número de ideas fortes.”

A.M. BONANNO

—————————————————————————————————————————————–

No ano 2008 un feixe de individualidades anarquistas de distintos puntos da Galiza, xa ligadas por anteriores proxectos, relacións de afinidade e por unha coordinación informal, sentimos a necesidade de dotarnos de órganos de expresión e tamén de xerar un espazo de referencia para a comunicación no que as distintas sensibilidades antiautoritarias puidesen construír, desenvolver o seu discurso e confrontar ideas, ademais de facilitar a súa coordinación mediante un labor informativo e visibilizar a nivel internacional tanto as loitas antagonistas que se desenvolven na Galiza, como dar a coñecer nestas latitudes distintas realidades e contextos de loita contra a dominación noutros territorios do mundo. Deste modo levamos a cabo a creación dunha revista en papel, complementada por un blogue de carácter máis dinámico e periódico que axudasen a encher ese baleiro. A estas ferramentas sumamos no ano 2015 un boletín mensual en formato impreso co que plasmar de forma máis eficiente nas rúas a nosa actividade, distribuído en distintos centros de estudo e traballo e porsuposto tamén nos distintos espazos libertarios do terruño. Este boletín publicaría a súa última edición en maio de 2017, tras 19 números.

Hoxe, despois de 9 anos de comunicación virtual e impresa ininterrompida, cos seus acertos e erros, tomamos a decisión de virar o noso temón cara outros horizontes, se cadra máis ambiciosos, e desde logo máis enriquecedores para as persoas que facemos parte de Abordaxe!. Así é como tomamos a decisión de salientar nosa faceta editorial (que xa viñamos exercendo coa publicación da compilación dos textos “Arredismo e Anarquia” e a primeira edición en galego de “Memorias de Liberdade”) e suspender o traballo contrainformativo do blogue e do boletín. Neste punto, nun clima de mudanzas e debates internos no seo do colectivo, sentimos a necesidade de deternos e de reformular o proxecto como editorial, mantendo tamén a nosa revista como pedra angular na que como xa dixemos noutras ocasións, é onde mellor e con máis saña destripamos o cadáver desta sociedade autoritaria e onde máis alegremente pasamos pola quilla os principios que a sustentan.

O certo é que este xiro responde a novos desafíos. Á vontade de continúar aprendendo e fornecéndonos de ferramentas teórico-prácticas que axuden a poñer en evidencia as distintas operacións especiais dos sistemas autoritarios, á necesidade de confrontar e xerar ideas e debates-chave nunha realidade na que somos presas da democraticidade e o mercado das opinións, e porsuposto á intención de investigar e recuperar a memoria respecto da loita contra a dominación e dos tecidos comunitarios e autoxestionarios que ligaron este e outros territorios durante longo tempo asegurando a súa supervivencia. Porque ao igual que a Orde da dominación ten unha historia que consideramos importante examinar co fin de obter unha maior comprensión de como enfrontala, tamén a loita contra esta Orde ten unha traxectoria que representa un arsenal do que non estamos dispostas a renunciar e que consideramos moi útil no contexto da guerra social aquí e agora.

Somos conscientes e estamos seguras das virtudes e as dificultades de todo este apaixonante reto que pretendemos levar a cabo a través do noso traballo editorial e das ferramentas que este pode achegar. Tamén somos conscientes e valoramos o baleiro que pode deixar a falta dunha ferramenta informativa específicamente anarquista a nivel galego, especialmente no aspecto da coordinación e da difusión das accións, comunicados e convocatorias. Pero tamén é certo que os tempos que vivimos non son os mesmos que cando Abordaxe! naceu para encher ese baleiro. Temos claro que afortunadamente hoxe en día hai máis xente e máis vontade para realizar este tipo de traballo que cando nós comezamos, e intuímos que a curto ou medio prazo haberá compañeiras con intención e disposición de afrontar esta tarefa. Ademais, sendo honestas, consideramos que a deriva das “redes sociais” e a lóxica de determinados comportamentos propios da sociedade do espectáculo, invaden aos colectivos anticapitalistas e parte dos libertarios, e isto non facilita moito a tarefa de desenvolver un proxecto de comunicación desde a nosa perspectiva, e esta batalla, nestes momentos, non queremos librala desde unha barricada “contrainformativa”, á marxe do necesaria, válida e respectable que nos poida parecer esa formulación, que é a que nos trouxo ata aquí tras case unha década de existencia.

Nas vindeiras datas o noso blogue mudará o seu aspecto e prestacións para facilitar unha experiencia de navegación máis axeitada ás características da súa nova función. Aproveitamos tamén para anunciar que xa estamos argallando novas edicións e o número 7 da nosa revista, así como distintas actividades para financialas, e que estamos abertas a toda achega económica e solidaria, tendo en conta que partimos de cero € nas nosas arcas. Comezamos unha nova etapa embarcándonos nesta travesía coa convicción de transitar unha ruta que nos permita vivir contra vento e mareas, asaltando os buques dos poderosos, e convidamos a tódolos espíritos aventureiros, rebeldes e subversivos a navegar connosco.

Vémonos nos mares revoltos!

Abordaxe!

Contacta connosco en abordaxe@bastardi.net

Advertisements

Entrevista realizada por Abordaxe! ás compas de Rojava Azadi, colectivo antiautoritario de Madrid para a solidariedade internacionalista co Kurdistán

Posted in anarquismo, entrevistas, internacional, península on Xuño 17, 2017 by abordaxe

Como moitas de vós xa saberedes e leríades, para o último número da nosa revista, aínda relativamente recente, decidimos facerlle unha entrevista ás compas do colectivo Rojava Azadi, un colectivo antiautoritario afincado na cidade de Madrid e que dedica a súa labor á solidariedade coa revolución kurda e coa loita das compañeiras kurdas pola súa emancipación e pola súa liberdade, contra o Capitalismo, o Patriarcado e o asedio imperialista que sofren por varios flancos distintos, destacando a xeopolítica xenocida de Occidente, de Turquía e do terrorismo do ISIS.

Agora decidimos transcribila para publicala no noso blogue, facilitando tamén a súa difusión. Queremos reiterar os nosos agradecementos ás compañeiras de Rojava Azadi pola súa colaboración nesta entrevista.

Ola, compañeiras. Gustaríanos antes de nada agradecervos o voso tempo e enerxía ao contestarnos a estas preguntas e permitirnos coñecer un pouco mellor vosa labor e o voso colectivo. Para empezar, podedes falarnos de Rojava Azadi? Cando xorde o colectivo? Que vos levou a un grupo de persoas de Madrid a organizarvos para comezar a poñer en marcha a solidariedade co pobo kurdo e o seu proceso revolucionario?

O proxecto ten as súas raices na manifestación que se organizou en Madrid en novembro de 2014 en solidariedade coa resistencia da cidade de Kobanê, que estaba a sufrir o asedio do Daesh (ISIS). Seguir lendo

Umha conversa entre o preso independentista Carlos Calvo Varela e as presas anarquistas Mónica e Francisco (atualmente em liberdade)

Posted in anarquismo, entrevistas, galiza, península on Maio 16, 2017 by abordaxe

mailA continuaçom, espalhamos, transcrita da ediçom impresa do jornal Novas da Galiza do passado mes de abril, umha entrevista realizada pelo preso independentista Carlos Calvo ás companheiras Mónica e Francisco, quando as compas encontravam-se na cadea con ele.

As companheiras Mónica e Francisco já nom se encontram, afortunadamente, nas cadeas espanholas, e foram expulsas a Chile onde estam livres na rúa, após que o Tribunal Supremo fixara sua condenaçom definitiva en 4 anos e 6 meses (tendo por tanto as compas ja mais da metade da condenaçom cumprida e podendo optar ao beneficio de mudar o que restaba de condena pela expulsom e a proibiçom temporal de entrar em territorio espanhol). Pensamos que esta é umha entrevista moi interessante e que permite conhecer melhor e comparar o contexto chileno co contexto espanhol en xeral e o galego em particular.

Desde Abordaxe! parabenizamos ao preso independentista Carlos Calvo e a equipa de redacçom do Novas da Galiza pola laboura realizada con esta entrevista.

En novembro de 2013 a polícia detivo em Barcelona as anarquistas chilenas Mónica Caballero e Francisco Solar. Eram as primeiras presas dumha vaga repressiva do Estado contra o movimento anarquista e, até o de agora, as únicas que resultárom condenadas. Enquanto mantínhamos esta conversa o Tribunal Supremo fixou a condena em quatro anos e meio de prisom para cada umha (Nota de Abordaxe!: A condena inicialmente dictada pola Audiencia Nacional contra as compañeiras ao rematar o seu xuízo en marzo do 2016 foi de 12 anos e medio para cada unha, dos 45 anos que solicitaba por cabeza a fiscalía). Compartimos aquí agora, mais ou menos ordenadas, as ideias que fomos enfiando enquanto corríamos no pátio ou através do “correio intermodular”. [Nota: As dúas anarquistas nom estám atualmente em prisom após comutar-se a sua pena por umha expulsom do estado espanhol]. Seguir lendo

Entrevista ás compas de Fraguas, proxecto de okupación rural en Guadalajara en risco de desaloxo

Posted in anarquismo, entrevistas, península on Abril 24, 2017 by abordaxe

Tiramos e traducimos de Regeneración Libertaria esta entrevista realizada ás compas que se atopan habitando en Fraguas, un pobo okupado nesta pedanía castelá, perto de Guadalajara, e que agora atópase en risco de desaloxo, o que tamén supón un perigo extra para algunhas das persoas que alí viven, imputadas e ás que piden 4 anos de cárcere (a cada unha) máis o pago de cuantiosas multas.


Desde o mesmo instante que nos decatamos da ameaza de desaloxo deste proxecto de okupación rural na pequena pedanía de Fraguas (Guadalajara), puxémonos en contacto co grupo de xestión desta iniciativa porque criamos que a mellor maneira de difundir o seu proxecto e amosarlles a nosa solidariedade, era precisamente realizando unha entrevista onde nos respondesen en primeira persoa a todas as nosas preguntas e ganas de saber, que non foron poucas.
Seguir lendo

“A era dos grandes propagandistas”-entrevista con Dolors Marín-

Posted in anarquismo, entrevistas, historia on Febreiro 16, 2017 by abordaxe

Das distintas entrevistas realizadas pola comisión de radio do XIV Encontro do Libro Anarquista de Madrid (celebrado en decembro do pasado ano), a realizada por Dolors Marín sobre a súa ponencia “A era dos grandes propagandistas”, é unha a destacar. A historiadora mergulla nos alicerces históricos da teoría e a práctica anarquistas analizando a algúns dos seus protagonistas e a súa proxección contemporánea.

[Audio] Entrevista axs compañeirxs Elisa Di Bernardo e Gabriel Pombo da Silva no programa antirrepresivo e anticarcelario Anarkustika (Radio RSK, Barcelona)

Posted in anarquismo, audiovisual, entrevistas, internacional, península on Novembro 11, 2016 by abordaxe

As compas de Radio RSK (Nou Barris, Barcelona) veñen de publicar na rede a entrevista que fixeron no seu programa anticarcelario e antirrepresivo Anarkustika o 1 de novembro ás compas Gabriel Pombo da Silva (anarquista galego que pasou máis de 30 anos no cárcere, incluíndo 8 anos na prisión de Aachen, en Alemaña) e Elisa di Bernardo (anarquista italiana que participaba no blogue anarquista de contrainformación Culmine e que foi represaliada durante a Operación Ousadía anos atrás xunto a outrxs compañeirxs), aproveitando a palestra que ambxs compañeirxs deron dentro do Tattoo Circus de Barcelona (realizado no CSO L’ Astilla entre o 28 e o 30 de outubro).

Velaquí vos deixamos o arquivo para escoitalo. Para descargar, clickade aquí e a continuación, premede o botón dereito do rato e seleccionade “Gardar como”.

Sivan Zerdesti, delegado do Congreso Nacional Kurdo: “O Estado-nación é a orixe dos problemas de Oriente medio”

Posted in entrevistas, internacional on Xullo 16, 2016 by abordaxe

2015-09-13-kurdistan-01

Sivan Zerdesti, delegado do Congreso Nacional Kurdo, leva meses percorrendo América Latina e a Península Ibérica presentando o “Manifesto por unha civilización democrática”, obra do encarcerado líder kurdo Abdullah Öcallan. O libro, composto de cinco tomos, é indispensable para coñecer a realidade do pobo kurdo. A fins de xuño, no seu paso por Euskal Herria convidado pola Asociación vasco-kurda Newroz, foi entrevistado por Alvaro Hilario. Desde Abordaxe! difundimos e traducimos. Seguir lendo