Ao respeito da detençom de ontem de Heitor N. “Koala” no aeroporto Sá Carneiro de Porto

Dim nos falsimedios que Koala é um terrorista de Resistência Galega, condeado a 11 anos de prissom pola Audiência Nacional espanhola (tribunal herdeiro do TOP franquista).

Dim os medios independentistas que Koala foi sentenciado a tantos anos após ser denunciado por um arrependido (Xurxo Rodríguez) que colaborou com a Justiça espanhola e que embora o tribunal especial carecia de provas, além das declaraçons do arrependido, no juízo foi condenado por participaçom em “organizaçom terrorista” e “colocaçom de explosivos” na voadura de antenas de TV e rádio no monte Sam Paio de Vigo em 2012.

Dim os falsimedios que Resistência Galega é o único grupo terrorista do estado espanhol em ativo e que se tem convertido desde há tempo num dos principais objectivos das forças de seguridade do Estado. Dim que o Koala é um dos ativistas destacados de Resistência Galega.

Dim os medios indpendentistas que a detençom de Heitor Naia polo Serviço Estrangeiro de Fronteiras (SEF) de Portugal, seguindo as diretrizes espanholas, é um má notícia, pois incorpora Portugal à colaboraçom com a repressom espanhola contra o independentismo galego.

Dim os falsimedios que estas detençons tenhem lugar um mês depois do encontro em Lisboa do ministro espanhol do Interior, Jorge Fernández Díaz, com a ministra portuguesa de Administração Interna, Anabela Rodrigues. Nesse encontro, o ministro espanhol alarmou sobre a intençom do “grupo terrorista Resistência Galega” de, segundo ele, estabelecer umha base logística no norte de Portugal e destacou a troca de informaçom e confiança mútua entre ambos os regimes.

Dim os medios indpendentistas que a detençom, com um suposto cargo de falsificaçom de documentaçom, suporia o encarceramento do militante independentista galego e o cumprimento íntegro da condena imposta pola Audiencia Nacional em dezembro.

Dim uns e outros que Koala estava em liberdade pendente do recurso ao Tribunal Supremo e que o SEF tinha já informaçons prévias sobre o seu possível deslocamento a Porto por via terrestre para embarcar no voo das 11h36 com destino Caracas.

E digo eu, ou mais bem pergúnto-me, como se vende que um perigossísimo terrorista do único grupo terrorista em ativo do estado espanhol estivera até ontem em liberdade desde que saira da prissom em 13 de dezembro de 2012 tras estar em detençom preventiva 2 meses? Cicais eu som parvo de mais pero nom me quadra nada com a política do medo do governo espanhol que alguém tam perigoso poidera estar em liberdade pendente dum recurso.

O único que se me passa pola minha cabeçinha é que o deixaram em liberdade mas moi vigiado, tam vigiado que ao pouco que se movera iam saber onde ia e a que ia, e nesse caso, o que nom me quadra nada é que o ativista fora até Porto para tentar fugir dessa estreita vigiânça, a sabendas de que Portugal é o foco onde o aparetagem repressivo espanhol tem posto o olho na busca da suposta base logística de RG.

Nom o entendo, a verdade é que nom o entendo. Vesse que nom tenho madeira de herói ou nom som tam tolo.

Esperarei a que hoje o Organismo Popular Anti-repressivo CEIVAR facilite informaçom de última hora sobre este processo repressivo, a situaçom das pessoas envolvidas, etc. Colo pois acá os lugares e horas das concentraçons informativas e de solidariedade de hoje quinta feira 12 de março:

BURELA: Praça do Concelho às 20h30
COMPOSTELA: Praça do Pam às 20h30
FERROL: Praça do Concelho às 20h30
OURENSE: Praça do Ferro às 20h30
VIGO: Farola de Urzáiz às 20h30
LUGO: Praça Maior 20h30
CORUNHA: Obelisco 20h30

Tancredo Tantonto para Abordaxe